Kyrkjefluda
Nord om Jensholmen ligg Kyrkjefluda i Røyrasundet. På fluda står ein steinvarde med merkestang. Varden er gamal og syner at leia går nord om varden. Namnet kjem truleg av at ein ser fluda frå kyrkjetufta på Herøy.
Kyrkjefluda i Røyrasundet
Leia sørover Røyrasundet
Gjennom Røyrasundet, mellom Leinøya mot nord og Herøyholmane sørover, går den indre hovudleia langs kysten. Her har den nok gått så lenge folk har ferdast i båt langs kysten.
Over dette sundet går Herøybrua, som vart opna av Kong Olav i 1976. Då vart Ytre del av Herøy kommune landfast med indre Herøy. Det har vore trangt her for store båtar, då Skallen på 4m djupt låg midt i sundtet rett vest av brua. Denne er no nyst fjerna av kystverket, og båtar treng ikkje ta hensyn til grunna lenger. Seglingshøgda under brua er 30m.
Der brua kjem i land på Leinøya, ligg den gamle stova til overtollbetjent, Johan Christoffer Brun (1792 - 1865). Han var ein fargerik person i området her, midt på 1800-talet. Han var premierløytnant av grad, og hadde i sine yngre år vore med under Napoleonskrigane. I sitt sivile liv brukte han å halde selskap for dei kondisjonerte i område, på militært vis. Han hadde fleire saluttkanoner rundt på garden, også på høgste fjellet bak tunet. Det vart saluttert høglytt i Røyrasundet når Brun skulle halde selskap.
